Stiki hefur ráðið Guðjón Viðar Valdimarsson sem vörustjóra RM Studio og ráðgjafa. Guðjón hefur víðtæka reynslu og sérþekkingu á sviði endurskoðunar, fjármálastjórnar og verkefnistjórnunar hjá hinum opinbera og einkageiranum. Guðjón hefur starfað við innri endurskoðun og tölvuendurskoðun hjá PwC, Ernst & Young og erlendis hjá Kuwait Petroleum International.

„Við hjá Stika fögnum að fá Guðjón til liðs við okkar teymi. Hann hefur víðtæka þekkingu og reynslu sem mun efla ráðgjafarstarfsemi fyrirtækisins og efla þróun á RM Studio, hugbúnað til áhættu- og gæðastjórnunar sem nú er í notkun hjá hátt í 70 fyrirtækjum í 17 löndum," segir Erlendur Steinn Guðnason, framkvæmdastjóri Stika.

Guðjón hefur komið að tölvuendurskoðun og innri endurskoðun hjá fjölda fyrirtækja bæði hér og erlendis og hefur víðtæka þekkingu og reynslu á þessu sviði. Guðjón var áður sjálfstætt starfandi ráðgjafi á sviði innri endurskoðunar, tölvuendurskoðunar og ráðgjafi varðandi áhættugreiningu. Guðjón með M.Sc gráðu í fjármálum frá CBS, faggildur innri endurskoðandi (Certified Internal Auditor) með sérhæfingarpróf í innri endurskoðun banka og fjármálafyrirtækja (Certified Financial Services Auditor). Hann er einnig með sérhæfingarpróf í tölvuendurskoðun (Certified Information Systems Auditor) frá Information Systems Audit and Control Association (ISACA.)

Undanfarin ár hefur Guðjón verið stundakennari í meistaranámi í reikningshaldi og endurskoðun við Háskóla Íslands en einnig verið virkur í félagsstarfi Félags um innri endurskoðun og er formaður alþjóðanefndar þess félags. Hann hefur einnig skrifað fjölda greina á sviði innri endurskoðunar/tölvuendurskoðunar og haldið fyrirlestra um það efni á vettvangi Félags um innri endurskoðun, Dokkunar og hjá fyrirtækjum og stofnunum.

RM Studio byggir á íslensku hugviti og hefur verið þróað hjá Stika síðan 2004. Frekari upplýsingar um RM Studio má finna á http://www.riskmanagementstudio.com.